داعش کی درندگی ، عراق میں 80 سالہ خاتون کوزندہ جلا دیا
شدت پسند تنظیم کے جنگجوؤں نے یزدی فرقے کی 42 عورتیں شام میں فروخت کر دیں
بغداد(خبرایجنسیاں)عراق اورشام میں سرگرم عمل شدت پسند تنظیم داعش نے عراق میں ایک اسی سالہ عورت کو زندہ جلا دیا ۔ریڈیو تہران کی رپورٹ کے مطابق داعش کے جنگجووں نے عراق کے شمالی صوبے نینوا کے شہر موصل کے جنوب میں ایک اسی سالہ عیسائی عورت کو اس وجہ سے زندہ جلا دیا کہ اس نے داعش کے افکار کی مخالفت کی تھی ۔ داعش کے دہشت گردوں نے عراق کے کچھ علاقوں پر گزشتہ سال سے قبضہ کر رکھا ہے ۔ ادھر شدت پسند گروپ دولت اسلامیہ عراق و شام داعش نے عراق کے یزدی فرقے سے لونڈیاں بنائی گئی 42 خواتین کو مشرقی شام کی دیر الزور گورنری کے المیادین شہر میں ایک نیلامی میں فروخت کر دیا ہے ۔ آبزرویٹری برائے انسانی حقوق کے ایک بیان میں بتایا گیا ہے کہ داعشی جنگجوؤں نے یزدی فرقے کی یرغمال بنائی گئی خواتین کو المیادین کے ایک مقامی ہیڈ کوارٹر میں فروخت کیا۔ گزشتہ روز مجموعی طور پر 42 خواتین کو بیچا گیا اور ان کے بدلے میں 500 سے 2000 ڈالر تک فی کس رقم وصول کی گئی۔
